ತೇಲುವ ರಾಷ್ಟ್ರೀಯ ಉದ್ಯಾನವನ…! ಇಂತಹ ಅಪರೂಪದ ತಾಣ ಇರುವುದು ನಮ್ಮ ದೇಶದಲ್ಲಿಯೇ…! ಕೇಳುವಾಗಲೇ ಅಚ್ಚರಿಯಾಗುತ್ತದೆಯಲ್ವಾ…? ನಿಜ, ವಿಶ್ವದಲ್ಲಿಯೇ ಇಂತಹ ಅಪರೂಪದ ತಾಣವೊಂದು ಭಾರತದಲ್ಲಿದೆ. ಇಂತಹ ಸುಂದರ ಮತ್ತು ಅಪರೂಪದ ಜಾಗ ಇರುವುದು ಮಣಿಪುರದಲ್ಲಿ. ಈ ಉದ್ಯಾನವನದ ಹೆಸರು ಕೈಬುಲ್ ಲಂಜಾವ್ ಪಾರ್ಕ್. ಮಣಿಪುರದ ಬಿಷ್ಣುಪುರ್ ಜಿಲ್ಲೆಯಲ್ಲಿ ಸುಮಾರು 40 ಚದರ ಕಿಮೀ ಅಂದರೆ 15.4 ಸ್ಕ್ವೇರ್ ಮೈಲ್ ವಿಸ್ತೀರ್ಣದ ಈ ಉದ್ಯಾನವನವಿದೆ. ಮಣಿಪುರದ ರಾಜಧಾನಿ ಇಂಫಾಲದಿಂದ ಸುಮಾರು ಒಂದೂವರೆ ಗಂಟೆ ಪ್ರಯಾಣಿಸಿದರೆ ಈ ಅಪರೂಪದ ಉದ್ಯಾನವನ ಸಿಗುತ್ತದೆ.
ಭಾರತದ ಅತೀ ದೊಡ್ಡ ಸಿಹಿ ನೀರಿನ ಸರೋವರವಾದ ಲೋಕ್ಟಾಕ್ ಸರೋವರದ ಭಾಗವಿದು. ಇದು ನೀರಿನಲ್ಲಿ ತೇಲುವ ರಿಂಗ್‍ನಂತೆ ಕಾಣುವ ಸಸ್ಯಗಳಿಂದ ಕೂಡಿದೆ. ಸ್ಥಳೀಯವಾಗಿ ಇದನ್ನು ಫುಮ್ಡಿ ಎಂದು ಕರೆಯಲಾಗುತ್ತದೆ. ಈ ಫುಮ್ಡಿಗಳು ಕೆಲವು ಕಡೆ ಸಾಕಷ್ಟು ಗಟ್ಟಿಯಾಗಿವೆ. ಈ ತೇಲುವ ಫುಮ್ಡಿಯಲ್ಲಿ ಸಾಕಷ್ಟು ಜೀವರಾಶಿಗಳು ತಮ್ಮ ಬದುಕು ಕಟ್ಟಿಕೊಂಡಿವೆ. ಬಲು ಅಪರೂಪದ ಸಂಗೈ ಜಿಂಕೆಗಳ ನೆಲೆ ಇದು. ಇವುಗಳ ನೈಸರ್ಗಿಕ ಆವಾಸಸ್ಥಾನವನ್ನು ರಕ್ಷಿಸುವ ಸಲುವಾಗಿ 1966ರಲ್ಲಿ ಇದನ್ನು ವನ್ಯಜೀವಿ ಅಭಯಾರಣ್ಯವಾಗಿ ರೂಪಿಸಲಾಗಿದೆ. ನಂತರ 1977ರಲ್ಲಿ ಇದು ರಾಷ್ಟ್ರೀಯ ಉದ್ಯಾನವನವಾಗಿತ್ತು. ಈ ಅಪರೂಪದ ಜಿಂಕೆಗಳಲ್ಲದೆ, ಹಲವು ಹಾವುಗಳು, ಸಾಕಷ್ಟು ಪಕ್ಷಿ ಸಂಕುಲಗಳೂ ಇಲ್ಲಿ ನೆಲೆ ಕಂಡುಕೊಂಡಿವೆ. ಇದನ್ನು `ಬರ್ಡ್ ಪ್ಯಾರಡೈಸ್’ ಎಂದೂ ಕರೆಯಲಾಗುತ್ತದೆ. ಇದು ಮಣಿಪುರದ ಪ್ರವಾಸಿ ಸ್ಥಳ ಕೂಡಾ ಹೌದು.
