ಮಾರುತಿ ಸುಜುಕಿ ಇಂಡಿಯಾದ ಕಾಂಪ್ಯಾಕ್ಟ್ ಸೆಡಾನ್ ಮಾರುತಿ ಸುಜುಕಿ ಡಿಜೈರ್ ಭಾರತದ ವಾಹನ ಮಾರುಕಟ್ಟೆಯಲ್ಲಿ 30 ಲಕ್ಷ ಮಾರಾಟದ ಗಡಿ ದಾಟಿ ಸಾಧನೆ ಮಾಡಿದೆ. 2008 ರಲ್ಲಿ ಡಿಜೈರ್ ಅನ್ನು ಪರಿಚಯಿಸಲಾಗಿತ್ತು. ನಾಲ್ಕು ಪೀಳಿಗೆಗಳಲ್ಲಿ ವಿಕಸನಗೊಂಡ ಡಿಜೈರ್ 2025ರ ಕ್ಯಾಲೆಂಡರ್ ವರ್ಷದಲ್ಲಿ ದೇಶದಲ್ಲಿ ಅತಿ ಹೆಚ್ಚು ಮಾರಾಟವಾದ ಕಾರು ಆಗಿದ್ದು, ಆ ವರ್ಷದಲ್ಲಿ 214,000 ಕ್ಕೂ ಹೆಚ್ಚು ಯುನಿಟ್‍ಗಳನ್ನು ಮಾರಾಟವಾಗಿತ್ತು ಎಂದು ಕಂಪನಿ ಹೇಳಿಕೊಂಡಿದೆ.
ಈ ಕಾರಿನ ಆರಂಭಿಕ ಎಕ್ಸ್ ಶೋರೂಮ್ ಬೆಲೆ 6.25 ಲಕ್ಷ ರೂಪಾಯಿ ಆಗಿದೆ. ದಕ್ಷತೆಯ ವಿಷಯದಲ್ಲೂ ಇದು ಗಮನ ಸೆಳೆಯುತ್ತದೆ. ಈ ಸೆಡಾನ್ ಪೆಟ್ರೋಲ್ ಮ್ಯಾನುವಲ್ ರೂಪದಲ್ಲಿ 24.79 ಕಿಮೀ/ಲೀ ಮತ್ತು ಎಸ್-ಸಿಎನ್‍ಜಿ ಮೋಡ್‍ನಲ್ಲಿ 33.73 ಕಿಮೀ/ಕೆಜಿ ಇಂಧನ ದಕ್ಷತೆ ಒದಗಿಸುತ್ತದೆ ಎಂದು ಕಂಪನಿ ಹೇಳಿಕೊಳ್ಳುತ್ತದೆ.
ಇತ್ತೀಚಿನ ನಾಲ್ಕನೇ ತಲೆಮಾರಿನ ಡಿಜೈರ್ ಅನ್ನು 2024ರಲ್ಲಿ ಭಾರತದಲ್ಲಿ ಬಿಡುಗಡೆ ಮಾಡಲಾಯಿತು. ಇದು ಕಂಪನಿಯ ಝಡ್-ಸರಣಿ ಎಂಜಿನ್‍ನಿಂದ ಚಾಲಿತವಾಗಿದ್ದು, ಹಲವಾರು ಸಂಪರ್ಕಿತ ಮತ್ತು ಅನುಕೂಲಕರ ವೈಶಿಷ್ಟ್ಯಗಳನ್ನು ನೀಡುತ್ತದೆ.
