ಏಪ್ರಿಲ್ 10ರಿಂದ ನಗದು ರಹಿತ ಟೋಲ್ ಪಾವತಿ ವ್ಯವಸ್ಥೆ: UPI ಪಾವತಿಯಲ್ಲಿ ನೀಡಬೇಕು 1.25 ಪಟ್ಟು ಹೆಚ್ಚು
ಭಾರತೀಯ ರಾಷ್ಟ್ರೀಯ ಹೆದ್ದಾರಿಯ ಟೋಲ್ ಪ್ಲಾಜಾಗಳು ಇನ್ನುಮುಂದೆ ನಗದು ರಹಿತವಾಗಲಿದೆ. ಏಪ್ರಿಲ್ 10 ರಿಂದ ರಾಷ್ಟ್ರೀಯ ಹೆದ್ದಾರಿಗಳಲ್ಲಿ ಪ್ರಯಾಣಿಸುವವರು ನಗದು ಬಳಸಿ ಟೋಲ್ ಶುಲ್ಕ ಪಾವತಿಸಲು ಸಾಧ್ಯವಿಲ್ಲ. ಹಾಗೊಂದು ವೇಳೆ ಮಾನ್ಯವಾದ FASTag ಇಲ್ಲದೆ ಯುಪಿಐ ಪಾವತಿ ಮಾಡಿದರೆ ಹೆಚ್ಚುವರಿ ಹಣ ಪಾವತಿಸಬೇಕಾಗುತ್ತದೆ. ಈ ಮೂಲಕ ಸಂಪೂರ್ಣ ಡಿಜಿಟಲ್ ಪಾವತಿಗಳು ಮತ್ತು ಸಂಪೂರ್ಣ ಎಲೆಕ್ಟ್ರಾನಿಕ್ ಟೋಲ್ ಸಂಗ್ರಹ ವ್ಯವಸ್ಥೆಗೆ ಒತ್ತು ನೀಡಲಾಗುತ್ತದೆ.
ಇನ್ನು ಮಾನ್ಯವಾದ FASTag ಇಲ್ಲದೆ ವಾಹನವು ಟೋಲ್ ಪ್ಲಾಜಾವನ್ನು ಪ್ರವೇಶಿಸಿದರೆ, UPI ಮೂಲಕ ಪಾವತಿಯನ್ನು ಇನ್ನೂ ಅನುಮತಿಸಲಾಗುತ್ತದೆ. ಆದರೆ ಈ ಶುಲ್ಕವು ನಿಗದಿತ ಟೋಲ್ ಶುಲ್ಕಕ್ಕಿಂತ 1.25 ಪಟ್ಟು ಹೆಚ್ಚಾಗಿರುತ್ತದೆ. ಈ ಕ್ರಮವು ದಕ್ಷತೆ ಹೆಚ್ಚಿಸುತ್ತದೆ ಎಂದು ಅಧಿಕಾರಿಗಳು ಹೇಳುತ್ತಾರೆ. ಟೋಲ್ ಪ್ಲಾಜಾಗಳಲ್ಲಿ ದೀರ್ಘ ಸರತಿ ಸಾಲುಗಳು ನಿರಂತರ ಸಮಸ್ಯೆಯಾಗಿದೆ. ಪ್ರತಿ ವಾಹನವು ಸಣ್ಣ ವಿಳಂಬವಾದರೂ ಕೆಲ ಸಮಯದಲ್ಲಿ ಕಿಲೋಮೀಟರ್‌ಗಳಷ್ಟು ದಟ್ಟಣೆಯನ್ನು ಉಂಟುಮಾಡಬಹುದು. ಹೀಗಾಗಿ ಈ ಸಮಸ್ಯೆ ತಗ್ಗಿಸಲು ಈ ವ್ಯವಸ್ಥೆ ನೆರವಾಗುತ್ತದೆ. ಜೊತೆಗೆ ಕಡಿಮೆ ಕಾಯುವ ಸಮಯಗಳು ಕಡಿಮೆ ಇಂಧನ ಬಳಕೆಗೆ ನೆರವಾಗುತ್ತದೆ ಎಂಬ ಲೆಕ್ಕಾಚಾರವೂ ಇದೆ.
ಈ ಬದಲಾವಣೆಯು ಸಾಮಾನ್ಯ ಪ್ರಯಾಣಿಕರಿಗೆ ಸಂಪೂರ್ಣವಾಗಿ ಹೊಸತಾಗಿ ಅನಿಸದೇ ಇರಬಹುದು. ಜೊತೆಗೆ ಕೆಲ ವರ್ಷಗಳಿಂದ ಟೋಲ್ ಪ್ಲಾಜಾಗಳಲ್ಲಿ ನಗದು ಪಾವತಿಗಳು ಈಗಾಗಲೇ ಕಡಿಮೆಯಾಗಿವೆ.
